NatuurLIT neem jong ontdekkers op ’n kleurvolle reis deur die wêreld van voëls in Suid-Afrika. In hierdie lewendige sessie leer kinders om verskillende voëls te herken, hul roepgeluide te verstaan en meer te ontdek oor hul gewoontes en leefgebiede. Deur interessante feite, speelse aktiwiteite en visuele voorbeelde word kinders aangemoedig om die natuur rondom hulle raak te sien en te waardeer. Hierdie sessie kweek nuuskierigheid, aandag vir detail en ’n liefde vir die wonderlike voëlwêreld.
In samewerking met die Nasionale Museum met demonstrasies.
Sosialemedia-sensasie Fehmz bars die kookboekwêreld binne met resepte so gewaagd en onbewoë soos sy self is. Haar debuutkookboek Damn Good Food se meer as tagtig resepte bring die speelse, aromatiese disse waarvoor sy bekend is van die skerm na die bladsy. Dink aan beproefde familieresepte soos skaap-akhni, maalvleiskerrie en klapperpoeding, maar ook prettige variasies soos chilli-bite-wafels, karak-roomys, kataifi-millefeuille en haar geurige magic masala en red dynamite-sous. Haar aansteeklike energie en flopvrye instruksies verander alledaagse kookkuns in ’n avontuur.
Fehmz is ’n stadsmeisie van Johannesburg wat haar drome as ’n kos-, leefstyl- en reisbeïnvloeder nastreef. Sy glo sterk daarin om dinge eg en outentiek te hou. Haar lewendige persoonlikheid deurdrenk elke resep met energie, kleur en gewaagde geure wat deur haar Moslem-erfenis geïnspireer is. Fehmz is energiek, kleurvol en borrelend van gees, hou van tee en om die eenvoudige dinge in die lewe te deel. Sy is getroud en het twee kinders.
Kom kuier by die leefstyltent tydens die Vrystaat Kunstefees en geniet voorlesings deur bekendes uit die vermaaklikheidsbedryf van LAPA se gewilde kinderboeke.
Stella Blakemore is 120 jaar gelede naby Lindley gebore. Sy is bekend as skrywer van kosskoolverhale wat seuns en dogters veral vroeër jare getroue lesers gemaak het. Die bekendste hiervan is die Maasdorp- en Keurboslaan-reekse. Vir die Keurboslaan-reeks het sy haar Afrikaanse oupa se naam en van – Theunis Krogh – gebruik. Die reekse is al talle kere herdruk en bly steeds gewild. Blakemore het sowat 50 boeke gepubliseer en ’n merkwaardige bydrae tot Afrikaanse jeuglektuur gelewer.
Aangebied deur NALN.
Die digter Johann Lodewyk Marais is 70 jaar gelede in Hillbrow gebore, maar word groot op die plaas Sans Souci in die distrik Harrismith, waar hy Sotho vlot leer praat. As plaaskind ontwikkel hy ’n groot liefde vir die natuur. Hy begin op hoërskool ywerig lees. Sy eerste gedig is in standerd 9 in Die Vaderland gepubliseer. Sy eerste digbundel, Die somer is ’n dag oud, verskyn in 1983 en word in 1984 met die Ingrid Jonker-prys bekroon. Sy werk word hoog aangeprys en onder meer as “natuurgevoelig” bestempel. Hy skryf ook reisboeke en biografieë.
Aangebied deur NALN.
’n Insiggewende paneelgesprek aangebied deur Netwerk24 wat fokus op aktuele sake, politiek en die kwessies wat Suid-Afrikaners raak. Verwag deurdagte gesprekke, kenners se perspektiewe en ’n dieper kyk na die stories agter die nuus.
Thérèse Bartman en Fourie Botha gesels oor hul digbundels Die helfte is jou nie vertel nie en Kolam. In haar bundel ondersoek Bartman die krag en beperkinge van die geskrewe woord en keer sy terug na die orale, klankryke tradisie van poësie om stories en ervarings ’n stem te gee. Botha se Kolam verweef uiteenlopende temas tot ’n fyn, ineengevlegte geheel waarin waarneming, herinnering en verlies saamkom. Hierdie gesprek verken hoe digters betekenis vorm uit uiteenlopende ervarings, en hoe poësie nuwe patrone van verstaan, herinnering en skoonheid kan skep.
Thérèse Bartman debuteer as digter in Nuwe Stemme 3 (2005). Van haar gedigte is in versamelbundels opgeneem, insluitend Groot Verseboek. As Thérèse Hulme skryf sy verskeie kinderboeke, asook Praat jy! Idees vir die skep van ’n skryfkultuur in die klas (2022). Sy is ’n narratiewe terapeut en mentor vir onderwysers en mense wat met kinders werk en het ’n DTh in Praktiese Teologie met Spesialisasie in Pastorale Terapie.
Fourie Botha is ’n digter, redakteur en redaksionele konsultant wat in Engels en Afrikaans werk. Hy het meer as twintig jaar in die uitgewersbedryf gewerk en was vir nege jaar die plaaslike fiksie-uitgewer by Penguin Random House South Africa in Kaapstad. Hy het met talle bekroonde skrywers gewerk en speel steeds ’n aktiewe rol in die literêre wêreld. Botha is die outeur van verskeie digbundels, waaronder Kolam.
Ryan Blumenthal is ’n forensiese patoloog wat al meer as 13 000 nadoodse ondersoeke uitgevoer het en daagliks in die lykshuis werk om die oorsake van dood en moontlike misdade te bepaal. In Trace vertel hy van ongewone sake, van vlak grafte en vermeende vergiftigings tot weerligslae, muti-moorde en ander seldsame ongelukke. In die aangesig van talle vorme van onnatuurlike sterftes sien hy homself as ’n stem vir die stemloses, op soek na geregtigheid vir die dooies en waarheid vir hul geliefdes.
Ryan Blumenthal is ’n forensiese patoloog met meer as ’n kwarteeu se ervaring in die veld. Sy eerste boek, Autopsy: Life in the Trenches with a Forensic Pathologist in Africa, het ’n niefiksie-blitsverkoper geword en is in Afrikaans en Russies vertaal. Sy tweede boek, Risking Life for Death: Lessons for the Living from the Autopsy Table, is in 2023 gepubliseer.
Ná die sukses van Valskermbataljon-verhale gee ’n tweede bundel gehoor aan die groot aanvraag van lesers en valskermsoldate wat gretig is om hul stories te deel. Valskermbataljon-verhale II bied eerlike, eerstehandse vertellings van intense opleiding, gevegservarings, kameraderie en humor, soos vertel in elke soldaat se eie stem. Hierdie opregte narratiewe weerspieël ervarings wat lewens diepgaande gevorm het. Die boek bied insig in die manne in maroen – deurtrek van moed, veerkragtigheid, verlies en nadenke – se lewens, hul bande en hul buitengewone eenheid.
Mike Bolhuis, ’n voormalige lid van die Valskermbataljon, is ’n bekende Suid-Afrikaanse privaatondersoeker en stigter van Specialised Security Services (S.S.S.). Met meer as 35 jaar se ervaring het hy ’n sterk reputasie opgebou in die hantering van ernstige gewelds-, ekonomiese en kubermisdaad. Sy organisasie word dikwels as ’n “laaste uitweg” beskou. Sy Christelike waardes en fokus op die rehabilitasie van slagoffers het hy hom as ’n baanbreker in misdaadbestryding gevestig.
Tara Roos ontleed Suid-Afrikaanse politiek in ’n era van toenemende populisme en onsekerheid. Sy ondersoek strukturele swakhede, strategiese foute en party-identiteitskrisisse wat gelei het tot ’n onstabiele koalisieregering. Politieke partye word in die kategorieë wenner, verloorder of oorlewende gegroepeer, wat sukses, mislukking en groeipatrone beklemtoon. In ’n demokrasie wat steeds gevorm word deur die beloftes van 1994, ondersoek Where to from here? hoe politici die mense in die steek gelaat het en roep die kiesers op om aanspreeklikheid en beter leierskap te eis.
Tara Roos is ’n politieke ontleder en die parlementêre korrespondent vir Business Day. As ’n voormalige parlementêre navorser, bestuur sy die veelgelese nuusbrief Tara’s Take Substack en is mede-aanbieder van die The Bill-potgooi saam met Lester Kiewit van CapeTalk.
