Zama Zama openbaar die verborge werking van Suid-Afrika se onwettige goudhandel deur onderhoude met mynwerkers, sindikaat-infiltreerders, intelligensiebeamptes en wetstoepassers. Dit ondersoek ’n gewelddadige onderwêreld van bendeoorloë, korrupsie en wrede wetstoepassing. Dit beskryf hoe goud gesmokkel, gewas en weer in die wêreldmark ingelyf word deur private smelterye, vals permitte en BTW-bedrog. Die boek spoor ook die onwettige goudhandel se internasionale omvang na, en toon die skakels tussen ondergrondse mynbedrywighede en georganiseerde misdaad, terrorismefinansiering en globale korrupsienetwerke.
Graham Coetzer is ’n bekroonde Suid-Afrikaanse ondersoekende joernalis en televisievervaardiger. Sy werk het hom op baie avonture regoor Afrika geneem. Hy het die Nasionale Persklub se Joernalis van die Jaar-toekenning gewen en is genomineer vir die gesogte Taco Kuiper-toekenning sowel as die Global Shining Light-toekenning. Hy woon in Pretoria.
Hercules Boshoff en Pieter Duvenage gesels oor hul boeke Verantwoording en Bewegende Denke. Albei werke vra hoe ons sinvol en verantwoordelik kan dink in ’n tyd van kitsantwoorde, tegnologiese verandering en morele onsekerheid. Van Aristoteles se idees oor die mens as talige en politieke wese tot die insigte van moderne filosowe soos Hegel, Heidegger, Arendt en Habermas, ondersoek die gesprek hoe denke, wysheid en oordeel ons kan help om sin en verantwoordelike handeling in ’n komplekse wêreld te vind.
Pieter Duvenage, Suid-Afrikaanse filosoof, akademikus en openbare denker, is tans buitengewone professor in filosofie aan die Noordwes-Universiteit. Sy werk beweeg op die grens tussen filosofie, etiek en openbare lewe en hy staan bekend vir sy vermoë om klassieke denke met hedendaagse vraagstukke te verbind. As denker en gespreksgenoot fokus hy op verantwoordelike oordeel, gesprek en verstaan in ’n tyd van sosiale verdeeldheid en tegnologiese versnelling.
Hercules Boshoff is ’n navorsingsgenoot van die Independent Institute of Education se Varsity College-kampus in Kaapstad. Hy was voorheen vakhoof van filosofie en besigheidsetiek by Akademia en postdoktorale navorser by Noordwes-Universiteit. In 2019 voltooi hy sy doktorale studie getiteld “Ekonomie en Subjektiwiteit”. Hy skryf gereeld rubrieke.
’n Insiggewende paneelgesprek aangebied deur Netwerk24 wat fokus op aktuele sake, politiek en die kwessies wat Suid-Afrikaners raak. Verwag deurdagte gesprekke, kenners se perspektiewe en ’n dieper kyk na die stories agter die nuus.
Thérèse Bartman en Fourie Botha gesels oor hul digbundels Die helfte is jou nie vertel nie en Kolam. In haar bundel ondersoek Bartman die krag en beperkinge van die geskrewe woord en keer sy terug na die orale, klankryke tradisie van poësie om stories en ervarings ’n stem te gee. Botha se Kolam verweef uiteenlopende temas tot ’n fyn, ineengevlegte geheel waarin waarneming, herinnering en verlies saamkom. Hierdie gesprek verken hoe digters betekenis vorm uit uiteenlopende ervarings, en hoe poësie nuwe patrone van verstaan, herinnering en skoonheid kan skep.
Thérèse Bartman debuteer as digter in Nuwe Stemme 3 (2005). Van haar gedigte is in versamelbundels opgeneem, insluitend Groot Verseboek. As Thérèse Hulme skryf sy verskeie kinderboeke, asook Praat jy! Idees vir die skep van ’n skryfkultuur in die klas (2022). Sy is ’n narratiewe terapeut en mentor vir onderwysers en mense wat met kinders werk en het ’n DTh in Praktiese Teologie met Spesialisasie in Pastorale Terapie.
Fourie Botha is ’n digter, redakteur en redaksionele konsultant wat in Engels en Afrikaans werk. Hy het meer as twintig jaar in die uitgewersbedryf gewerk en was vir nege jaar die plaaslike fiksie-uitgewer by Penguin Random House South Africa in Kaapstad. Hy het met talle bekroonde skrywers gewerk en speel steeds ’n aktiewe rol in die literêre wêreld. Botha is die outeur van verskeie digbundels, waaronder Kolam.
In hierdie rugbyversameling vier veteraanskrywer Michael Green onvergeetlike karakters wat hul merk op die veld gelaat het, onder andere Kwagga Smit, Beast Mtawarira, Percy Montgomery, Chester Williams en Prins Alexander Obolensky. Benewens hul wedervaringe vertel Green ook van sy eie kleurryke ervarings: ’n konfrontasie met Joost van der Westhuizen, ’n dorp wat droog gedrink word ná ’n oorwinning oor die All Blacks en ’n omstrede Stellenbosch-kroegtoer. Dit is geen alledaagse rugbyboek nie, maar ’n uitbundige reis vol humor, drama en genot.
Michael Green is ’n Suid-Afrikaanse skrywer en rugby-entoesias, bekend vir Pale toe! Met ’n liefde vir die spel en ’n oog vir stories neem hy lesers deur die rugbywêreld – van veld tot mense. Sy skryfwerk meng humor en insig en bied ’n unieke blik op die kultuur, uitdagings en onvergeetlike oomblikke wat rugby besonders maak.
Die parlement het eienaardige tradisies en unieke titels vir ampsdraers – woorde soos speaker, sweep, ampstaf, ampswag, lesings, afpaar en verdelings – wat verwarrend kan wees. Waarom word ’n stil voorsitter steeds ’n “speaker” genoem; en waarom moet ’n nuutverkose speaker letterlik na die voorsitterstoel gesleep word? Waarom word wetsontwerpe twee keer voorgelees? Hierdie boek beantwoord hierdie vrae en meer op ’n boeiende, dikwels humoristiese wyse, met hoofstukke vol ware verhale van amusante situasies en unieke parlementêre persoonlikhede.
Dr. Pieter Mulder was 30 jaar lank ’n parlementslid en het talle parlemente wêreldwyd besoek. Voor sy politieke loopbaan was hy dosent, medeprofessor en departementshoof aan die Noordwes-Universiteit, waar hy ook sy doktorsgraad verwerf het, en het postdoktorale studies in Wisconsin voltooi. Met sy ryk ervaring stel hy ’n unieke boek oor die parlement saam, deurdrenk met humor en ware verhale uit die parlementêre lewe.
Suiker (1958) van Hugo Claus is een van sy beste en veelbekroonde dramas, waarin taal, naturalisme, melodrama en humor meesterlik saamvloei. In ’n suikerfabriek in Noord-Frankryk wag vyf Vlaamse gasarbeiders op die einde van die seisoen. ’n Driehoekverhouding tussen die geslepe Max, die naïewe Kilo en Malou, ’n jong vrou, ontvou binne ’n paar dae tot ’n klimaks. Die verhaal simboliseer paradysverlies en die verganklikheid van drome, die enigste manier om die harde werklikheid te verduur.
HP (Hennie) van Coller is uitstaande professor (emeritus) en navorsingsgenoot aan die Universiteit van die Vrystaat. Hy is die skrywer en redakteur van talle publikasies, waaronder die alombekende Perspektief en profiel. ’n Literatuurgeskiedenis (2016) en Etienne Leroux: Die rumoerige swart nar. ’n Huldiging (2023). Hy is veelvuldig bekroon met onder meer die Gustav Preller-prys vir literatuurwetenskap, die Jan H Marais-prys en die NP van Wyk Louw-medalje van die Suid-Afrikaanse Akademie vir Wetenskap en Kuns.
Tussen oorloë en wêrelde volg die verhaal van Rebekka, ’n kampkind van die Anglo-Boereoorlog wat as arm bywoner op Kameeldoornplaas grootword. Skrander en lief vir leer, word sy gedwing om skool te verlaat en uiteindelik aan die Wright-gesin “verkoop”. In Oxford vind sy haar voete as kinderoppasser, met nuwe kennis en vriendskappe wat haar wêreld verbreed. Maar oorlog dreig weer, en Rebekka worstel met haar identiteit – tussen Boer en Brit, plaas en herehuis.
Irma Joubert is ’n oudonderwyser, spesialis joernalis en ongetwyfeld die doyenne van Suid Afrikaanse historiese fiksie. Haar boeke, soos die Tussen stasies-, die Pontenilo– en die Oorlogs-trilogieë, is almal plaaslike topverkopers en is in Engels, Nederlands en Duits vertaal en wêreldwyd gepubliseer. Irma bly in die Kaap, maar reis nog graag om navorsing vir haar boeke te doen.
In hierdie oorspronklike en unieke verhaal bied Henning van Aswegen, ’n voormalige dosent aan Suid-Afrika se Nasionale Intelligensie-akademie en die historikus Peter M Swanepoel ’n diepgaande analitiese weergawe van Suid-Afrika se intelligensiedienste en spioenasie-operasies. In die 1970’s en 1980’s het die Daisy Spioenasiering verslag gedoen oor die strawwe kompetisie tussen Moskou en liberale, sosio-demokratiese Westerse regerings om “die rewolusie vas te vang”. Dis ’n verhaal wat veertig jaar lank geheim was en nooit tevore vertel is nie. Tot nou toe.
Henning van Aswegen is in Bloemfontein gebore en het as ’n offisier in die Suid-Afrikaanse Weermag (SAW) en Suid-Afrika se burgerlike intelligensiedienste gedien. As student aan die Potchefstroomse Universiteit het hy as korrespondent vir die Suid-Afrikaanse Geassosieerde Koerante (SAAN) gewerk en later by die Perskor-groep as ’n politieke korrespondent. Hy is ’n intelligensiehistorikus en skrywer, bekend vir sy boeke en artikels oor die Suid-Afrikaanse burgerlike intelligensiedienste.
Peter M Swanepoel is in Vryheid gebore. Hy het politieke wetenskap, filosofie en historiese studies aan die Universiteit van Johannesburg gestudeer. Hy het later nagraadse studies in intelligensie en internasionale betrekkinge aan King’s College London gevolg. Sy akademiese artikel, “The International University Exchange Fund (1977-1980)” (2016), het The Daisy Spy Ring geïnspireer. Hy doen nou navorsing oor en skryf oor die geskiedenis van fietsry in Suid-Afrika.
Nadat hy skandaal, kontroversie en die Zuma-jare oorleef het, het Paul Mashatile deur die geledere tot by die drumpel van die presidentskap gestyg. Oor ’n politieke loopbaan van dertig jaar het hy suksesvol die korrupsie en faksievorming waarvoor die ANC bekend geword het, genavigeer. Nou wil hy beheer neem oor die party – en die Uniegebou. Die vraag is: Moet hy? Is Paul Mashatile geskik vir die hoogste amp?
Pieter du Toit is die outeur van die topverkoperboeke Die Stellenbosch Mafia en The ANC Billionaires. Hy is die adjunkredakteur van News24.com.
