Met sy geliefde klaviertreffers, oud én nuut, en die bekendstelling van sy nuwe boek, KLAWER, neem Rocco de Villiers die gehoor op ’n reis deur die klein, kleiner en kleinste dorpies van Suid-Afrika. Hierdie konsert is meer as net musiek – dit is Rocco se dankbare geskenk aan die hart van die land: sy dorpe, sy stories, sy mense. ’n Intieme feesviering van musiek, herinnering en inspirasie – saam met Hansie Roodt op kitaar en bastrom.
genre: Kontemporêr
MUSICAL MOMENTS
’n Aand van die mooiste treffers oor alle tye uit musiekblyspele soos Les Misérables, Chess, Phantom of the Opera, Sound of Music en vele meer. Daar word ook ander persoonlike gunstelinge in die program verweef. Die begeleiding word behartig deur Anton Esterhuyse op die klavier en die virtuoos Sharon de Kock op die viool
Wat om te doen as die wêreld brand
Die wêreld is aan die brand, maar die engel/orakel/demi-godin wat die kliëntedienssentrum van die kosmos eiehandig beman, is uitgebrand en het haarself afgeboek. Die groot oor van die heelal is geheel en al oor dit. Wie gaan nou na die mensdom se gesanik luister, raad gee oor verhoudings en vure doodslaan waar hulle dreig om verwoesting te saai?
Drie van die Bestes – Danie Niehaus, Mathys Roets en Germandt Geldenhuys
Drie uiteenlopende stemme en persoonlikhede vervleg hul stemme meesterlik in ’n harmonieuse vertoning met tydlose gunstelinge en nuwe klanke. Die groep het meer as 25 jaar gelede ontstaan en al het die samestelling oor die jare verander, is die kombinasie van Roets en Niehaus se musikale ondervinding en Geldenhuys se jeugdige aanslag ’n wenresep. Hul sang is eg, hul energie aansteeklik en hul liefde vir musiek straal uit elke lied.
HOORT
Hierdie semi-outobiografiese kabaret laat jou lag, huil en met nuwe oë na jou eie verhaal kyk. Stephanie, die dogter van twee pastore, soek haar plek in die wêreld te midde van haar gemengde agtergrond en ons komplekse geskiedenis. Met humor, patos en ‘n lewendige mengsel musiek kom sy tot die besef: Om in te pas is een ding, maar om te behoort is iets heeltemal anders. Hoort is bekroon met die Stellenbosch Woordtrofee vir Uitsonderlike Bydrae tot Kontemporêre Musiek: Klein Groepe.
Jak de Priester – Van Sally tot Somerset-Wes
In 2001 skryf Jak de Priester sy eerste groot treffer, “Sally Williams Nougat”, die treffer wat die begin van ’n merkwaardige loopbaan sou afskop. ’n Jaar later wen hy ATKV-Crescendo en stel hy sy debuutalbum bekend. Nou, 25 jaar later, kyk hy terug op ’n reis vol musiek en stories. Hierdie mylpaal word gevier met ’n konsert vol geliefde liedjies en die bekendstelling van sy boek, Jak de Priester – Van Sally tot Somerset-Wes, ’n huldeblyk aan sy indrukwekkende Afrikaanse musiekloopbaan.
Jou Ma Se Platespeler
In Jou Ma Se Platespeler kyk ons na Afrikaanse musiek deur die oë van die nederige platespeler, teen die agtergrond van veranderende musiektegnologie en die veranderinge in ons land wat ’n nuwe stem aan Afrikaanse kunstenaars gegee het. Al die treffers sedert 1930 – jou ouma se plate, jou pa se kassette, jou klasmaat se CD’s, jou kind se Spotify-speellys … dis alles hier.
Jy sal my nie glo nie
Pietman Geldenhuys vertel al stories van jongs af. Wat begin het met fabels het later ’n realiteit geword in die absurdhede wat hy in die praktyk ervaar het in ’n lewe op die pad saam met musikante en storievertellers. Hy deel van hierdie stories en die musiek wat hy daaroor geskryf het.
Kombuisliedjies: Jacobus Silwer
Die kombuistafel het ’n aura: hierdie bymekaarkompunt van siele wat soms vir ‘n oomblik sy spasie deel – verteltafel, singtafel, lagtafel, bakleitafel. Jacobus Silwer gaan op ’n ontdekkingsreis vanaf sy eie grootwordkombuis na die kombuistafels van uiteenlopende karakters uit verskillende wêrelddele. ‘n Unieke mengsel van musiek, prosa en poësie wat jy dalk nooit weer bymekaar in een vertoning gaan beleef nie!
Navi Redd
Moenie hierdie energieke optrede misloop nie. Navi Redd is weer in Bloemfontein en bring vars klanke, bekende lirieke en ’n verhoogteenwoordigheid wat jou van begin tot einde vasgenael hou. Sluit by ons aan vir ’n onvergeetlike musiekervaring. Ouer, wyser en gryser, dis iets vir die hele gesin.
