Bofelo Learns About Mandela Day volg die jong Bofelo op ’n betekenisvolle ontdekkingstog oor die belang van Mandela-dag. Deur eenvoudige, toeganklike storievertelling leer kinders oor vriendelikheid, gemeenskapsdiens en hoe klein dade ’n groot verskil kan maak. Die boek maak belangrike geskiedenis verstaanbaar vir jong lesers en moedig hulle aan om self ’n positiewe bydrae te lewer, in die gees van omgee en saamstaan.
genre: Boekgesprekke
In Biddende Verbondenheid
In ’n wêreld gekenmerk deur onreg en lyding, herwin Nico Koopman gebed as ’n transformerende krag. In Biddende Verbondenheid is geskryf tydens die Suid-Afrikaanse studente-opstande. Hierdie 52 weeklikse gebede bied ’n jaarlange reis wat gewete en optrede vorm. Deur temas soos rassisme, ongelykheid en ekologiese krisisse te verken, nooi die boek lesers tot moed, deernis en aktiewe geloof, en om in gebed agente van geregtigheid, waardigheid en vernuwing te word.
Prof. Nico Koopman is adjunkvisekanselier vir Sosiale Impak, Transformasie en Personeel aan die Universiteit Stellenbosch en professor in Sistematiese en Publieke Teologie. Hy was voorheen predikant en viserektor, is wyd gepubliseer, stigterslid van die Global Network for Public Theology en senior navorsingsgenoot by Princeton, met fokus op publieke teologie, versoenende geregtigheid en menswaardigheid.
Trace
Ryan Blumenthal is ’n forensiese patoloog wat al meer as 13 000 nadoodse ondersoeke uitgevoer het en daagliks in die lykshuis werk om die oorsake van dood en moontlike misdade te bepaal. In Trace vertel hy van ongewone sake, van vlak grafte en vermeende vergiftigings tot weerligslae, muti-moorde en ander seldsame ongelukke. In die aangesig van talle vorme van onnatuurlike sterftes sien hy homself as ’n stem vir die stemloses, op soek na geregtigheid vir die dooies en waarheid vir hul geliefdes.
Ryan Blumenthal is ’n forensiese patoloog met meer as ’n kwarteeu se ervaring in die veld. Sy eerste boek, Autopsy: Life in the Trenches with a Forensic Pathologist in Africa, het ’n niefiksie-blitsverkoper geword en is in Afrikaans en Russies vertaal. Sy tweede boek, Risking Life for Death: Lessons for the Living from the Autopsy Table, is in 2023 gepubliseer.
Valskermbataljon verhale II
Ná die sukses van Valskermbataljon-verhale gee ’n tweede bundel gehoor aan die groot aanvraag van lesers en valskermsoldate wat gretig is om hul stories te deel. Valskermbataljon-verhale II bied eerlike, eerstehandse vertellings van intense opleiding, gevegservarings, kameraderie en humor, soos vertel in elke soldaat se eie stem. Hierdie opregte narratiewe weerspieël ervarings wat lewens diepgaande gevorm het. Die boek bied insig in die manne in maroen – deurtrek van moed, veerkragtigheid, verlies en nadenke – se lewens, hul bande en hul buitengewone eenheid.
Mike Bolhuis, ’n voormalige lid van die Valskermbataljon, is ’n bekende Suid-Afrikaanse privaatondersoeker en stigter van Specialised Security Services (S.S.S.). Met meer as 35 jaar se ervaring het hy ’n sterk reputasie opgebou in die hantering van ernstige gewelds-, ekonomiese en kubermisdaad. Sy organisasie word dikwels as ’n “laaste uitweg” beskou. Sy Christelike waardes en fokus op die rehabilitasie van slagoffers het hy hom as ’n baanbreker in misdaadbestryding gevestig.
Where to from here?
Tara Roos ontleed Suid-Afrikaanse politiek in ’n era van toenemende populisme en onsekerheid. Sy ondersoek strukturele swakhede, strategiese foute en party-identiteitskrisisse wat gelei het tot ’n onstabiele koalisieregering. Politieke partye word in die kategorieë wenner, verloorder of oorlewende gegroepeer, wat sukses, mislukking en groeipatrone beklemtoon. In ’n demokrasie wat steeds gevorm word deur die beloftes van 1994, ondersoek Where to from here? hoe politici die mense in die steek gelaat het en roep die kiesers op om aanspreeklikheid en beter leierskap te eis.
Tara Roos is ’n politieke ontleder en die parlementêre korrespondent vir Business Day. As ’n voormalige parlementêre navorser, bestuur sy die veelgelese nuusbrief Tara’s Take Substack en is mede-aanbieder van die The Bill-potgooi saam met Lester Kiewit van CapeTalk.
Zama Zama
Zama Zama openbaar die verborge werking van Suid-Afrika se onwettige goudhandel deur onderhoude met mynwerkers, sindikaat-infiltreerders, intelligensiebeamptes en wetstoepassers. Dit ondersoek ’n gewelddadige onderwêreld van bendeoorloë, korrupsie en wrede wetstoepassing. Dit beskryf hoe goud gesmokkel, gewas en weer in die wêreldmark ingelyf word deur private smelterye, vals permitte en BTW-bedrog. Die boek spoor ook die onwettige goudhandel se internasionale omvang na, en toon die skakels tussen ondergrondse mynbedrywighede en georganiseerde misdaad, terrorismefinansiering en globale korrupsienetwerke.
Graham Coetzer is ’n bekroonde Suid-Afrikaanse ondersoekende joernalis en televisievervaardiger. Sy werk het hom op baie avonture regoor Afrika geneem. Hy het die Nasionale Persklub se Joernalis van die Jaar-toekenning gewen en is genomineer vir die gesogte Taco Kuiper-toekenning sowel as die Global Shining Light-toekenning. Hy woon in Pretoria.
Parlement Praatjies
Die parlement het eienaardige tradisies en unieke titels vir ampsdraers – woorde soos speaker, sweep, ampstaf, ampswag, lesings, afpaar en verdelings – wat verwarrend kan wees. Waarom word ’n stil voorsitter steeds ’n “speaker” genoem; en waarom moet ’n nuutverkose speaker letterlik na die voorsitterstoel gesleep word? Waarom word wetsontwerpe twee keer voorgelees? Hierdie boek beantwoord hierdie vrae en meer op ’n boeiende, dikwels humoristiese wyse, met hoofstukke vol ware verhale van amusante situasies en unieke parlementêre persoonlikhede.
Dr. Pieter Mulder was 30 jaar lank ’n parlementslid en het talle parlemente wêreldwyd besoek. Voor sy politieke loopbaan was hy dosent, medeprofessor en departementshoof aan die Noordwes-Universiteit, waar hy ook sy doktorsgraad verwerf het, en het postdoktorale studies in Wisconsin voltooi. Met sy ryk ervaring stel hy ’n unieke boek oor die parlement saam, deurdrenk met humor en ware verhale uit die parlementêre lewe.
Suiker
Suiker (1958) van Hugo Claus is een van sy beste en veelbekroonde dramas, waarin taal, naturalisme, melodrama en humor meesterlik saamvloei. In ’n suikerfabriek in Noord-Frankryk wag vyf Vlaamse gasarbeiders op die einde van die seisoen. ’n Driehoekverhouding tussen die geslepe Max, die naïewe Kilo en Malou, ’n jong vrou, ontvou binne ’n paar dae tot ’n klimaks. Die verhaal simboliseer paradysverlies en die verganklikheid van drome, die enigste manier om die harde werklikheid te verduur.
HP (Hennie) van Coller is uitstaande professor (emeritus) en navorsingsgenoot aan die Universiteit van die Vrystaat. Hy is die skrywer en redakteur van talle publikasies, waaronder die alombekende Perspektief en profiel. ’n Literatuurgeskiedenis (2016) en Etienne Leroux: Die rumoerige swart nar. ’n Huldiging (2023). Hy is veelvuldig bekroon met onder meer die Gustav Preller-prys vir literatuurwetenskap, die Jan H Marais-prys en die NP van Wyk Louw-medalje van die Suid-Afrikaanse Akademie vir Wetenskap en Kuns.
Rebekka van Kameeldoornplaas
Tussen oorloë en wêrelde volg die verhaal van Rebekka, ’n kampkind van die Anglo-Boereoorlog wat as arm bywoner op Kameeldoornplaas grootword. Skrander en lief vir leer, word sy gedwing om skool te verlaat en uiteindelik aan die Wright-gesin “verkoop”. In Oxford vind sy haar voete as kinderoppasser, met nuwe kennis en vriendskappe wat haar wêreld verbreed. Maar oorlog dreig weer, en Rebekka worstel met haar identiteit – tussen Boer en Brit, plaas en herehuis.
Irma Joubert is ’n oudonderwyser, spesialis joernalis en ongetwyfeld die doyenne van Suid Afrikaanse historiese fiksie. Haar boeke, soos die Tussen stasies-, die Pontenilo– en die Oorlogs-trilogieë, is almal plaaslike topverkopers en is in Engels, Nederlands en Duits vertaal en wêreldwyd gepubliseer. Irma bly in die Kaap, maar reis nog graag om navorsing vir haar boeke te doen.
The Daisy Spy Ring
In hierdie oorspronklike en unieke verhaal bied Henning van Aswegen, ’n voormalige dosent aan Suid-Afrika se Nasionale Intelligensie-akademie en die historikus Peter M Swanepoel ’n diepgaande analitiese weergawe van Suid-Afrika se intelligensiedienste en spioenasie-operasies. In die 1970’s en 1980’s het die Daisy Spioenasiering verslag gedoen oor die strawwe kompetisie tussen Moskou en liberale, sosio-demokratiese Westerse regerings om “die rewolusie vas te vang”. Dis ’n verhaal wat veertig jaar lank geheim was en nooit tevore vertel is nie. Tot nou toe.
Henning van Aswegen is in Bloemfontein gebore en het as ’n offisier in die Suid-Afrikaanse Weermag (SAW) en Suid-Afrika se burgerlike intelligensiedienste gedien. As student aan die Potchefstroomse Universiteit het hy as korrespondent vir die Suid-Afrikaanse Geassosieerde Koerante (SAAN) gewerk en later by die Perskor-groep as ’n politieke korrespondent. Hy is ’n intelligensiehistorikus en skrywer, bekend vir sy boeke en artikels oor die Suid-Afrikaanse burgerlike intelligensiedienste.
Peter M Swanepoel is in Vryheid gebore. Hy het politieke wetenskap, filosofie en historiese studies aan die Universiteit van Johannesburg gestudeer. Hy het later nagraadse studies in intelligensie en internasionale betrekkinge aan King’s College London gevolg. Sy akademiese artikel, “The International University Exchange Fund (1977-1980)” (2016), het The Daisy Spy Ring geïnspireer. Hy doen nou navorsing oor en skryf oor die geskiedenis van fietsry in Suid-Afrika.
